“Deputadu Balun La Hatene Uza Komputador”

.

Jornal Independente - Kuarta-feira, 22 Agustu 2012

Tama ona ba faze lejislatura Parlamentu Nasional (PN) nian, maibe sei iha deputadu balun ne’ebe seidauk hatene utiliza komputador hodi hala’o serviso.

Deputadu Mateus de Jesus, membru Bancada CNRT rekoinese situasaun ne’e iha PN, tanba, deputadu sira ne’e mai husi esperensia ne’ebe diferente.

“Ami mai iha Parlamentu nasional laos tenke pasa kursu komputador, inglesh no seluk tan, mais ami mai tamba desizaun politika,” tenik nia, iha uma fukun PN horsehik.

Nia hatutan, deputadu ida konsege tama PN, tamba primeiru konsiderasaun husi partidu, ne’ebe hikus mai hetan konfiansa husi povu hodi koalia sira nia problema.

“Ami deputadu barak mak la hatene komputador, inklui mos hau,” dehan Deputadu husi bancada CNRT ne’e.

Iha fatin hanesan, Deputada Jacinta Pereira hateten, realidade membru Parlamentu Nasional balun la hatene uza komputador, tanba mai husi esperensia la hanesan.

“Ne’e la problema, tanba iha tekniku ne’ebe fo apoiu,” informa nia.

.