Bancada Opozisaun La Menta: “Terseira Lejislatura PN Hatudu Imazen La Diak”

.

Notisia Husi TVTL - Segunda-Kalan, 06 Agustu 2012

Bancada Opozisaun lamenta ho knaar meja Parlamentu Nasional tamba iha segunda-feira semana ne’e laiha plenaria Parlamentu Nasional.

Bancada Opozisaun FRETILIN mos konsidera, situasaun ne’e hamosu imazen la diak ba povu no Parlamentu rasik la hatudu nia funsionamentu ho diak.

Segunda-feira ne’e, iha uma fukun Parlamentu Nasional deputadu husi terseira lejislatura husi Partidu koligasaun CNRT, PD no Frenti-Mudansa no opozisaun FRETILIN la hala’o Plenaria Parlamentu Nasional.

Deputadu husi bancada Opozisaun FRETILIN lamenta ho situasaun ne’e, tamba foin hahu terseira lejislatura hahu hatudu imazen la diak ba publiku, kona ba funsionamentu plenaria Parlamentu Nasional.

“Loloos meja ne’ebe eleitu tiha ona iha semana kotuk, tuir loloos hare ona rejolusaun ruma hodi bele hato’o mai plenaria para hola desizaun kona ba asuntu ida ne’e, ne’e asuntu ne’ebe importante tebes, lapresiza fali hein reuniaun lideres bancada ninian para deskute kona ba ida ne’e, purke, ne’e kompetensia plenaria nian para bele haree, hakarak mantein ka diminui Komisaun espesializadu nian ne’e, ne’e asuntu importante hodi hala’o servisu balun,” dehan Estanislau da Silva.

Ba kestaun ne’e, deputadu opozisaun Vice Prezidenti parlamentu Nasional hateten, Plenaria Parlamentu Nasional seidauk bele hahu, tamba sei hein desizaun enkontru lideres bancadas.

“Atu hahu plenaria ne’e tenki hein husi enkontru lideres bancada ninian, agora, komu Bancadas balun iha Parlamentu seidauk nomeia ninia ema, enatun seidauk bele halo reuniaun liderese bancadas ninian, kona ba agenda, kona ba plenaria programa servisu iha parlamentu ne’e desizaun liu husi lideres bancada, tamba ne’e mak ohin la halo plenaria, maibe aban sei hatama dokumentu husi partidu haat, lider bancada ou partidu tomak para hodi haree no koloka hodi debate sobre agenda parlamentu nian no mos sobre komisaun espesializada ba komisaun permanente, tamba seidauk iha enkontru lideres bancada hodi desidi agenda, entaun ohin seidauk bele halo plenaria, iha reuniaun bancada, Prezidenti sei bolus Bancada hotu-hotu depois maka foin halo ajenda, ne’e lider bancada mak deside,” dehan Adriano do Nascimento.

Tuir informasaun ne’ebe TVTL hetan asesu, lei kona ba pensaun Vitalisa, Lei Anti Korupsaun, lei kona ba rai no mos lei kona ba vitima de libertasaun nasional sei sai programa perioridade ba deputadus terseira lejislatura.

.