Bancada Opozisaun FRETILIN Konsidera: “Strutura V Governu Konstitusional Koloka Maun Alin De’it”

.

Notisia Husi TVTL - Tersa-Kalan, 07 Agustu 2012

Deputadu Bancada Opozisaun FRETILIN, Estanislau da Silva konsidera strutura kintu Governu Konstitusional hanesan Governu de irmaun.

Maske seidauk anunsia ofisialmente ba lista strutura kintu Governu konstitusional maibe tuir issu ne’ebe espailla iha komunidade nia leet katak, iha involvimentu maun alin balun ne’ebe assume pasta hanesan Ministru iha kintu Governu konstitusional.

Deputadu Estanislau da Silva husi bancada Opozisaun FRETILIN konsidera, ne’e hanesan governu maun alin, tamba Timor-Leste iha rekursu humanus ne’ebe barak maibe la fo oportunidade hodi kontribui ba nasaun ne’e.

“Hau hein katak, bainhira sira halo tiha juramentu ou tomada de posse mak ami fo komentariu, maibe hau hakarak hateten katak, bainhira ita haree ba lista ne’ebe ke iha V Governu konstitusional, iha malae nia lian hateten katak, tres parentes irmaun, ida ne’e halu lahatene, ida ne’e husu ba irmaun Primeiru Ministru dizitadu Xanana Gusmao mak bele esplika ida ne’e, maibe tuir, hanesan Timoroan ida hatudu katak, pareseke iha ita nia rai ne’e laiha ema seluk ona, maun alin sira ne’e mak ba ukun, agora ne’e ita bolu Governu de irmauns, hau admiradiu tebes tamba uluk kuandu katuas Mari kuandu iha Governu, ema barak kritika dehan katak, ne’e Governu maluk nian de’it, Governu Mari Alkatiri no nia alin sira deit, maibe agora ita haree katak, maun alin mak nakonu iha ne’eba, entaun Timor oan seluk laiha ona, ne’e konserteza Sr, primeiru Ministru xanana Gusmao nian kompetensia,” dehan Estanislau.

Iha parte seluk, deputadu Natalino dos santos husi Bancada CNRT hata’an ba kestaun ne’e hateten, lei la taka dalan ba Timoroan hotu, maibe Kay Rala xanana Gusmao, hanesan Prezidenti partidu CNRT no Primeiru Ministru iha kompetensia indizitadu atu eskoila Timoroan ne’ebe iha kapasidade atu ajuda Governu hodi atinji Governu nia planu ne’ebe iha ona.

.