“Alkatiri Dezafia Governu Publika Programa Iha Loron 100”

.

Jornal Timor Post - Kinta-Feira, 23 Agustu 2012

Eis Primeiru Ministru, Mari Alkatiri dezafiu membru V Governu tomak atu publika programa ne’ebe oras ne’e dadauk dezena hela iha loron atus ida nia laran (100).

Alkatiri hateten, nia husu atu membru Governu sira tenki publika programa ne’ebe iha, atu nune’e labele akontese hanesan iha kuartu Governu, ne’ebe Ministeriu no Sekretariu Estadu sira barak mak halao programa hanesan deit.

Pior liu tan, Sekretariu Jeral FRETILIN Mari Alkatiri hateten, estrutura kintu Governu ne’e boot tebes, ne’ebe tuir nia sei susar tebes halo programa hadau malu deit.

“Karik planu sira halo duni, fiar katak sira sei tau iha gaveta, tanba ne’e maka hau fiar katak sira sei la susesu, agora ita fo lai loron 100 para sira defini programa ba membru Governu ida-idak,” dehan Alkatiri ba Jornalista sira iha parlamentu Nasional, Segunda (20/8).

Alkatiri hatutan, ho kestaun ne’ebe nia preokupa, nia fiar katak Governu ida ne’e sei la susesu iha nia mandatu, liuliu nia sublinha, sei lakonsege ejekuta Planu Estratejia Dezenvolvimentu Nasional (PEDN) ne’ebe Primeiru Ministru rasik trasa tiha ona.

Alkatiri mos preokupa tebes ho estrutura governu ne’ebe iha Ministeriu ida iha Vise Ministru rua no iha tan sekretariu Estadu barbarak, tuir eis Primeiru Ministru ne’e katak, sei gasta deit osan estadu nian saugate.

“Sira sei hadau malu kompetensia, tanba Ministru ida iha membru Governu nain hat, entaun oinsa mak Ministeriu ne’e bele funsiona ho diak?, tanba se mak atu manda se?.” dehan Alkatiri.

.