“Adeus AMP, Bemvindo BGK”

.

Jornal Independente - Segunda-Feira, 06 Agustu 2012

Mandatu kuartu governu konstitusional Aliansa Maioria Parlamentar (AMP) ne’ebe lidera husi Primeiru Ministru xanana Gusmao sei remata iha tersa (7/8).

Entertantu, membru Governu sira hala’o ona serimonia despedida iha sabdu liu ba hodi intrega fali ba Governu foun mai ho naran ‘Bloku Governu Koligasaun’ (BGK).

Iha serimonia despedida ne’e halo membru governu AMP balun tanis hodi ekspresa sira nia tristeza ne’ebe durante tinan lima hamutuk hodi hasoru dezafiu ba interese dezenvolvimentu nasional.

Tuir observasaun INDEPENDENTE, membru Governu balun hakuak malu no tanis ho matan been, no balun kontenti hodi hamnasa.

Primeiru Ministru Xanana Gusmao hatete, durante tinan lima la’o hamutuk ho nia membru sira iha kuartu Governu konstitusional konsege koinese malu diak, balun ulun fatuk to’os, balun ulun fatuk mamar hodi halao servisu ho diak, ida ne’ebe ulun mamar, tuir xanana katak, nia nunka koalia barak maibe, hala’o servisu mak barak liu, entertantu ida ne’ebe mak koalia barak ka ibun boot, maibe nia servisu la la’o.

Nune’e, tuir Xanana ne’ebe lidera tan V Governu konstitusional ne’e katak, tempu ona hodi halo justisa ka presta justisa ba governu AMP durante tinan lima.

Nune’e mos Xanana rekoinese katak, estadu ne’ebe nia lidera seidauk to’o mehi ida ne’ebe bele dehan sufisiente ona, tanba ne’e, husu ba sira ne’ebe la kontinua assume knaar Ministru no Sekretariu Estadu iha Governu foun, husu atu nafatin fo kontribuisaun ba prosesu dezenvolvimentu nasional.

Nune’e, Governu AMP ne’ebe kompostu husi partidu lima hanesan, CNRT, PD, PSD, ASDT no UNDERTIM simu posse husi eis Presidenti Republika Jose Ramos Horta iha 8 Agusto 2007 no tuir planu, kintu Governu konstitusional sei simu pose husi Prezidenti Taur Matan Ruak iha kuarta-feira, 8 Agustu 2012 iha palacio Nobre, Lahane, Dili.

.